Ang pag-alaala kay Dr. Jose Rizal

                                                                              

             Ang buhay ni Dr. Jose Rizal ay naging makabuluhan hanggang sa kanyang mga huling yugto sa kanyang buhay. Masaya sa pakiramdam ang mabigyan ng pagkakataon na muling sariwain, alamin at bigyang pansin ang mga bagay na kanyang mga ginawa,  mga lugar na kanyang pinaglagian at pinuntahan, at ang mga lugar na kung saan ay parati natin siyang maaalala. Ang mga lugar na ito ang aming pinuntahan at inusisa. 

      
            Luneta

Ang bantayog ni Dr. Jose Rizal

           Ito ang bantayog ni Dr. Jose rizal na matatagpuan sa rizal park sa luneta na ang disenyo ay pinagbasihan sa gawa ng isang sweso na halos isang daang taon nang nakatayo. Kakikitaan ito ng maganda at maayos na pamamahala ng mga namumuno sapagkat hanggang ngayon ay di mo ito kakikitaan ng mga dumi sa paligid. Ang bantayog niyang ito ang laging nagpapaalala sa atin ng kanyang kadakilaan bilang isang pilipino at mananatiling inspirasyon sa lahat lalong lalo na sa mga kabataan na nais paghusayan ang kanilang kaisipan at kakayahan.

        Ito ang lugar na una naming pinuntahang magkakaibigan,  ang "national heritage" na ito ang isa sa pinakamahalagang pananda ng kagitingan ng isang filipino. Masarap sa pakiramdam ang muling masilayan ang bantayog ng ating bayani at mapagmasdan ang ganda ng ating bayan.

          Fort Santiago

Pasukan ng Fort Santiago 

                      

           Ang intramuros ay tinaguriang "walled city" at ang orihinal na manila na sentro ng pamumuno ng kastila. Sa intramuros ay matatagpuan mo ang Fort santiago na itinayo noong 1590 at natapos ng taong 1593 sa pamumuno ni gomez perez dasmariñas gamit ang matitigas na bato, karugtong ng pader ng Intramuros. Sa pasukan ng Fort Santiago ay makikita agad ang ganda ng lugar.

           Dito ang una naming pinuntahan sa intramuros ngunit medyo natagalan din kami sa paghahanap sapagkat nagkakamali kami sa aming mga nililikuan. Makikita mo dito ang magandang tanawin, malinis na paligid, at maayos na pamamahala ng mga nangangasiwa ng lugar. 

Ang piitin ni Rizal sa Fort Santiago 

          Dito ang naging kulungan ni Dr. Jose Rizal sa loob ng Fort Santiago noong nobyembre 3, 1896. Matatagpuan ito malapit sa rizal shrine museum at tunnel kung saan makikita ang isang daungan ng mga bapor noong kapanahunan ni rizal.
                       
           Makikita dito ang isang replica ni Dr. Jose Rizal habang siya ay nasa loob ng kanyang kulungan at dito mo rin makikita ang simula ng marka ng kanyang mga hakbang patungo sa bagumbayan.

Mga metal na yapak ni Dr.  Jose Rizal

           Ang mga metal na yapak ni Dr.  Jose Rizal na nagbibigay representasyon sa kanyang huling mga hakbang mula sa kanyang piitan patungo sa bagumbayan. Ito ang mga marka ng kanyang pagiging martir sa mga huling niyang oras noong disyembre 30, 1896.
   
           Isa ito sa mga nakakamanghang tignan sa paligid sapagkat maaari mong maisalarawan sa iyong isipan ang mga pangyayari na naganap habang papunta pa lamang siya bagumbayan.



                 Ateneo Municipal de Manila

Ang marka ng ateneo municipal de manila

           Ito ang lugar na unang pinagkakatayuan ng ateneo municipal de manila. Pinatayo noong 1817 sa pangalan na escuela pia de manila, pinamunuan ng pamahalaan noong 1831 sa pangalan na escuela municipal de manila, at  binigay sa pamamahala ng heswita noong 1901 sa pangalan na ateneo de manila. 

Ang bagong gusaling nakatayo sa dating ateneo        

          

           Ito ang sunod naming pinuntahan sa loob ng intramuros. Madali namin itong nahanap sa tulong ng mga gwardiya sibil. Dito nagtapos si Dr. Jose Rizal ng batsilor de artes na may grado ng sobresaliente noong 1877. Nasunog noong 1932 at ngayon ay kinatatayuan na ng isang bagong imprastraktura.

                 

               Unibersidad ng Sto. Tomas

     

           Dito dating nakatayo ang unibersidad ng Sto. Tomas kung saan siya nag-aral ng medisina noong 1877 hanggang 1882 na hindi na niya natapos pa dahil sa kanyang sigalot  sa mga may katungkulan. 

                         

Ang bagong gusali na pinagkakatayuan ng dating Sto. Tomas

           Ito ang bagong imprastrakturang nakatayo sa dating unibersidad ng Sto. Tomas. Dito kami sunod na pumunta pagkatapos namin sa ateneo at madali namin itong nahanap sa tulong ng gwardiya sibil na aming pinagtanungan.

                 Cuartel de España

Ang cuartel de españa

          Ito ang cuartel de españa na lugar kung saan nilitis si Dr. Jose Rizal noong  disyembre 26, 1896. Ito ay isa sa mga naging base ng kastila na nasira nang inatake ng mga hapones noong WW-II. 

          Ito ang isa sa mga nahirapan kami sa paghahanap sapagkat iba iba ang mga direksyon na aming nakukuha, ang una ay dun malapit sa simbahan,  ang sumunod ay dun sa may katabi ng light and sound, dun sa gilid ng PLM, sa harap  ng PLM, pero nung bumalik kami sa may katabi ng light and sound na ang alam namin ay dun talaga subalit iba lang pala ang nakalagay sa "marker".

Sa lood ng kwarto na pinaglitisan ni Rizal

            Dito pinapakita ang paglitis kay Dr. Jose Rizal habamg siya ay nakagapos sa loob ng kwarto ng cuartel de españa na isang replica na makikita sa rizal shrine museum sa Fort Santiago.

Kwarto ng pinaglitisan ni rizal

            Ito ang labas na replica ng kwarto kung saan nilitis si rizal noong disyembre 26, 1896 na makikita sa loob ng rizal shrine museum sa loob ng Fort Santiago.

                    Pambansang Museo

Ang pambansang museo

         Ito ang lugar na sunod naming pinuntahan na malapit sa intramuros at Rizal park. Nasaksihan namin dito sa pambansang museo ang iba't ibang mga obra ni Dr. Jose Rizal sa Gallery V. 

Isang iskultor ni Rizal

  

  

Self Portrait ni Rizal

          Ito ang mga bagay na aming nakita at napagmasdan sa loob ng pambansang museo. Mga obra at mga gawa patungkol kay rizal.

Isang pa sa iskultor na gawa kay Rizal

Isa sa unang self portrait ni Rizal

                         

Gallery V

                                                                 

                 Paco Cemetery

Libingan ni Rizal

            Dito unang nilibing si Dr. Jose Rizal matapos siyang barilin sa bagumbayan. Pagkatapos ay kinuha ng kanyang ina at inilagak sa binondo na di kalaunan ay dinala sa rizal park sa luneta.  

        

         Nagtagal din kami sa paghahanap ng lugar na ito dahil sa pabalik balik kami sa mga lugar ngunit masaya nang mapuntahan namin ito kahit medyo nakakapagod at sulit sapagkat masarap sa pakiramdam ang makita man lang ang una niyang libingan.

          Tahanan ni Higino Francisco

Ang dating kinatatayuan ng tahanan ni Higino Francisco

            Dito sa marka na makikita sa poste ang natitira na lamang na palatandaan kung saan matatagpuan ng dating nakatayong tahanan ni Higino Francisco na kung saan dinala ang mga labi ni Dr. Jose Rizal matapos kunin ng kanyang ina ang kanyang mga labi sa paco cemetery at dito rin sinasabing iniwan ang kanyang akda na Noli me tangere. 

         Dito kami sobrang nahirapan sa paghahanap sapagkat nung pinagpasya na naming sumakay na lamang sa trisikel at dahil alam daw ng drayber ang lugar sumakay na kami na inasahang mapabilis ang aming pagpunta doon.  Nagtaka kami sapagkat dinala kami ng drayber sa isang bahay na may marker at sinabi namin na hindi iyon ang aming hinahanap. hanggang sa umalis na kami kahit pinagpipilitan niya na dun na daw ang lugar. Nagpaikot ikot kami sa bawat kalye na wari mo'y di talaga niya alam ang nasabing lugar, at nung makarating na kami ay galit na galit siya sapagkat di magkatugma ang lugar na iyon sa sinabi namin na nais naming puntahan at naniningil pa ng karagdagang bayad. Nang makita namin ang lugar ay wala na ang bahay at kinuha na daw ang marka kaya nilagyan na lang ng marka ang poste doon para naman alam pa rin ang mismong lugar ng pinagkakatayuan ng tahanan. Naging masaya talaga ang huling lugar na ito sapagkat di naging madali ang aming huling paglalakbay sa sentro ni Rizal.

                

        

                Mga aral sa paglalakbay

           Marami ang mga aral na aming napulot at nadala sa aming pag-uwi. Pinaghandaan namin ang araw na ito bilang hamon na mahanap ang bawat lugar at hindi bilang isang nakakapagod na paglalakbay. Nais naming mapuntahan ang bawat exhibit kung saan mas marami kaming makikita, mababasa at matutunan. Maganda ang Fort Santiago subalit marami na rin talaga ang kailangang ayusin tulad na lang nang mga metal na yapak na sira na at mga kulang kulang pa. masarap talagang pagmasdan ang lugar na nagpapaalala ng ganda ng pilipinas noon, ang ganda ng lugar na iyon noon habang ang ilog pasig ay ang pinakamahalagang pangkalakalang daanan. nakakatuwa ang mga pedicab drayber sapagkat di sila nauubusan ng masasabi sa amin na mga kasaysayan at maiisip mo na parang buhay ang mga pangyayaring ito. nakakaasar talaga ang torre ng manila na nakakaharang sa bantayog ni Rizal at  nakakabawas ng ganda ng tanawin. napakahalaga ng mga bagay na ito para sa atin sapagkat nakakapagbigay inspirasyon ang bantayog na laging nagpapaalala sa atin na ang kabataan pa rin ang pag-asa ng bayan para sa pangkalahatang kaunlaran. 

          Ang bawat lugar na aming pinuntahan ay napakahalaga dahil kahit papaano ay nakita namin ang mga makasaysayang pook na ito. ang mga bagay at obra na aming nakita sa pambansang museo, ang mismong pook ng una niyang pinagkakalibingan, at ang lugar kung saan nilipat ang kanyang mga labi at itinago ang kanyang akdang noli. Itong mga lugar na ito ang magpapanatili sa atin na si Dr. Jose Rizal at ang isa sa nagtulak sa ating mga pilipino na ipaglaban ang ating karapatan.